Góðan daginn,

 

Þessi tölvupóstur er sendur til sveitarfélaga/félagsþjónustusvæða vegna endurgreiðslu úr ríkissjóði til sveitarfélaga með vísan í 15. gr. laga um félagsþjónustu sveitarfélaga. Ríkissjóður endurgreiðir sveitarfélögum fjárhagsaðstoð vegna erlendra ríkisborgara sem ekki eiga lögheimili í landinu og vegna erlendra ríkisborgara sem átt hafa lögheimili í landinu skemur en tvö ár. Gæða- og eftirlitsstofnun félagsþjónustu og barnaverndar (GEF) annast samskiptin við sveitarfélögin vegna þessa.

 

Mikilvægt er að sveitarfélög fylgi ferli sem sett hefur verið um endurgreiðslurnar en það er rakið hér á eftir.

 

Ferli endurgreiðslu vegna fjárhagsaðstoðar við erlenda ríkisborgara sem ekki eiga lögheimili í landinu og vegna fjárhagsaðstoðar við erlenda ríkisborgara sem átt hafa lögheimili í landinu skemur en tvö ár.

1. Endurgreiðslutímabil

Yfirstandandi endurgreiðslutímabil nær frá 1. nóvember 2018 til 31. október 2019.

2. Yfirlit yfir fjárhagsaðstoð sem óskað er eftir að fá endurgreidda

Sveitarfélag/félagsþjónustusvæði skal senda Gæða- og eftirlitstofnun félagsþjónustu og barnaverndar (GEF) yfirlit yfir útlagðan kostnað, sem hefur áður verið samþykktur, á þar til gerðum formum sem fylgja hér sem viðhengi.

3. Gögn sem óskað er eftir að fá send með yfirlitinu

Ekki þarf að senda gögn með yfirlitinu vegna endurgreiðslubeiðni fyrir fjárhagsaðstoð við erlenda ríkisborgara sem ekki eiga lögheimili í landinu enda er sú aðstoð ekki endurgreidd nema samþykki GEF hafi legið fyrir áður en aðstoðin var veitt.

Vegna endurgreiðslubeiðni fyrir fjárhagsaðstoð við erlenda ríkisborgara sem átt hafa lögheimili í landinu skemur en tvö ár skal fylgja afrit af hreyfingalista sveitarfélags þar sem fram kemur fjárhæð og skýring á þeim fjárhæðum sem þar koma fram.

4. Lokafrestur til að senda endurgreiðslubeiðni til GEF: Yfirlitið skal senda á netfangið gef@gef.is eigi síðar en 1. desember nk. Mikilvægt er að virða þennan tímafrest til að unnt sé að yfirfara yfirlitið og ganga frá greiðslu reiknings til sveitarfélaga, á yfirstandandi fjárhagsári.
5. Samskipti sveitarfélaga og GEF varðandi yfirferð á fjárhæðum: GEF leggur áherslu á að fara yfir endurgreiðslubeiðnir svo fljótt sem verða má. Miðað er við að eigi síðar en 15. desember hafi stofnunin samþykkt fjárhæðir sem óskað er eftir að fáist endurgreiddar eða komið athugasemdum á framfæri við viðkomandi sveitarfélag. Að sama skapi er æskilegt að sveitarfélag bregðist fljótt og vel við athugasemdum og spurningum stofnunarinnar séu vafaatriði til staðar. Verði töf á því að sveitarfélag bregðist við og gefi skýringar er ekki hægt að tryggja að unnt sé að endurgreiða sveitarfélagi þær fjárhæðir sem um ræðir, innan yfirstandandi fjárhagsárs.
6. Yfirlit samþykkt og reikningur gefinn út: Þegar GEF hefur samþykkt yfirlitið getur sveitarfélag gefið út reikning. Ekki þarf að senda nein fylgiskjöl með reikningnum sjálfum þar sem fylgiskjöl hafa nú þegar verið send GEF og GEF samþykkt fjárhæð reikningsins í samræmi við það. Óskað er eftir að sveitarfélag/félagsþjónustusvæði sendi ekki fleiri en í mesta lagi tvo reikninga vegna þessara endurgreiðslna, þ.e. einn vegna endurgreiðslu fjárhagsaðstoðar vegna þeirra sem ekki eiga lögheimili hér á landi og annan vegna endurgreiðslu aðstoðarinnar við þá sem átt hafa lögheimili hér á landi skemur en tvö ár.

 

Vinsamlega hafið samband ef spurningar vakna vegna þessa.

 

Bestu kveðjur,

Þórdís Birna